Tha Ve Viau Lo Maw?


Kan Band neih ve chhunte kan han sawi hnawm leh vak mai thin hi chu kei a zia lo ka ti thin, hman ni deuh khan YZTP te an rawn kal tih ka lo ral hriat ve a, ka hriat dan hmasak ber chu ka thian pa an Concert en tumin Ticket a chanloh thu min rawn hrilh kha a ni awm e. Chumi hnuah an Video arawn thleng thla ve leh nawlh a, a hnu deuhah khawi chanchinbu phek nge mawni Aizawl lam atanga thil rawn fun nana an hman hi phur zetin ka lo chhiar fuh ve leh hlauh pek a. Chutah chuan YZTP te Concert hlawhtling zia thu te arawn ziak luam a, Article tir lamah kan Mizorama Band kan neih ten an tluk lo ti lam hawi zawng deuhin a ziak bawk a. Engemaw chenah chuan tluklohna pawh an lo nei mial mai thei, mahse kan ti ve teh ang (khanglang ana) hetiang vang ringawta kan Zorama Band neih tha ve tak tak te a fuih zawng ni lova thu kan chhakchhuak leh phoh thin hi chu a fuh chiah lovin ka hria. T'un min lo haw lo se, tha hnem ngaihna vang zawkin vei zawng zawng rawn puah chhuahpui ve pawp pawp mai teh ang.


Keichu kan Band neih ve te hi an tha ve viau tawh ka lo ti asin, hmasawnna tur chu an nei teuh hlawm ang. Mahse, hetianga hun reilote chhunga mahni irawm chhuak hla tha an phuahchhuak ve thei mai thinte hi an chhuanawm ka ti. Kan YZTP te khan eng hla nge an rawn sak chu ka hre vek lova, hla hlui mawi takin an sa tih erawh chu ka hre ve ngei a. Kum engemawzah chu an zai tawh ka ring bawk, an Experience hmel hlawm khawp mai. A kum zawnga teh dawn chuan kan Band neih la naupang tak tak te hi chuan an pha lo ngawt hlawm ang, kan Band neih ve zinga mi te hi chu khang YZTP ho Music Play tan tirh kha chuan kawng sirah an la intheng kah ve zak zak mai thei asin. A chhan chu Aizawla kan Band neih tam zawk te hi han en ula an la upa lo hlawm teh ania, kan Band neih te hi a hriat pawh ka hre kim vekin ka ring bik lem lova chu la naupang tak tak vek an niin ka hre ve ngawt a. Boomerang, Magdalene, Incarnation, Drop Doubt, Bad Combination leh Band dang dang an hming ka theih nghilh tawh(hriat renglohna hi a tha zawk a) te pawh kan nei ve nual a. Heng ho hi an mahni hriat chiang vak lemloh pawn an la upa lo hlawm hle tih erawh a hriat nghal mai a, mahse an thlen chinah chuan an tih tlak ve tawh hlawm khawpin ka hria.


Hman ni deuh khan Aizawl Vana Pa Hall-ah N.E Beat Contest a awm tih pawh ka lo chhiar fuh ve leh hlauh a, kan Band neih Drop Doubt, Incarnation leh Boomerang te an che tha niin ka lo hria a. Ka lawmpui hlawm khawp mai, Drop Doubt Vocalist hi hman deuha College Beat Contest-a a zai ka ngaihthlak atanga thiam ka tih ve tawh a ni a, an Bassist pawh hi a thiam chur chur khawp mai. Incarnation ho Vocalist pawh hi a aw a sang tha vah vah ania, an Band Music hrim hrim pawh hi a tha tek tawk khawpin ka hria. Bad Combination ho Combination thatzia pawh kan hre tlang tawh viau a, Tete-i Ralte pawhin Live-a zaipui atan a duh a ni chek ang chu an zai ho zing ta em mai. Boomerang te hi ka la hre vak lova chu an tha ve tawk viau turah kan ngai ngawt a, a chhan chu tun hnai deuh maiah khan hmundanga an fehchhuah naah khan an che tha viau a nih awm kha. A theih chin chinah chuan kan Band neihte hi hmundanga Competition neihnaah hian tel ve thei thin atan an itawm khawp mai, an mahni Experience atan pawh a tha ve hrim hrim a.


Hetih lai vek hian Gospel Band la naupang tak Magdalene ho lah chu vai leh vai ni lem chuang lo India ram hmun hrang hranga Rock Band tam tak in tih siakna lar Roorkie IIT lamah pakhatna an lo zuk ni zui a. A bikin Magdalene te hi an lawmpuiawm khawp mai, Mizo ti hming tha tu an va ni em. Nikum lamah Great Indian Rock-ah an zai tawh a, Rock Street Journal Magazine ho tih chhuah thin kum tir lam Special Issue-ah pawh G.I.R-a zai ho hla awmna C.D-ah Magdalene te hla hi a lo awm ve ngei tawh kha. Anni Band hi Gospel Band dik tak an ni a, khawi hmunah pawh an zai hmain Lal biakna sawi hmasa thlap zel chi an ni a. Mihring ve tho an nih avangin fel chungchuang bik viaua hmuh tum erawh a fuh bik chiah lovang, mahse heng ho zai an zir hma pawha tawngtai rual thin an nih avangin an chhuanawm tak zet a ni. Aizawl-a an Album Release Vana Pa Hall-a an Concert-a kal ve kan thianpa pakhat pawhin Concert en tu tam zia leh thiam a tih thu min hrilh ve luam tawh nghe nghe, ka awm ve lo erawh pawi ka ti khawp mai. Kan Band neihte hi kei chuan ka chhuang hlawm a, tha ve tawk viau niin ka hria. Hmasawn zel tura taima turin ka fuih ve duh hlawm bawk a ni, India ram zau takah hian Mizo hming ti tha tu ni turin pen chhuak ve pawp zel turin Mizo Badn hrang hrangte ka sawm bawk a ni. Eng Band pawh nise Gospel emaw Pel lo emaw taimakna leh inthian thatna awm lo Band chu an hlawhtling ngai lovang.


Aizawl-a Concert nei tura hmundang atanga rawn kal ve te hi chu kan la hriat ngai lohte an ni tlangpui a, hei vang hian an Concert kan lo hlutsak viau pawh ti ila a dik ve thei tho awm e. An zai hmuh zen zen tur a awm dawn loh avangin en loh kan hlau pawh a ni mial mahna, Smokie leh Petra te pawh hi Aizawl-ah an rawn kal leh tawh dawn em ni? Kha deih kha a sin, kan hawk dak ve laklawh sia hei vang hian hmun dang atanga lo kal te kan lo hlut viau thin pawh hi a awm lo chuang love.


Kan belh leh lawk duh chu a infuih zawng ni lova thu ziah hi i sim ang u tih hi a ni, thil kan khaikhin dawn a nih pawhin khai khin dante thiam ila. Kan khai khin ate kha an Experience te ngaihtuah lawk hmasa ila, chuti anih loh chuan putar leh naupang hriat tam lam khai khin te pawh kan ang thei awm asin. Mizo Band kan neih zingah hian taima tak tak an tam tih a hriat reng a, taima zel turin ka duhsakna ka hlan a. Band dangte er zawng ni lo a tha zawnga khum tum ranin han tang sauh sauh hlawm se, Mizoram chhung ni lo hmun danga in tihsiakna awm changte hian a theih phawt chuan tel tum ve zel ta hlawm se. Kan mi hausa zingah hian hetiang lama tha hnem ngaia Band te zin man tur thehchhuahsak thei hi kat nuk mai se ava lawmawm dawn em, hmundang intihsiakna kal reng tur chuan an Band sumin a tlin reng bik arinawmloh avangin mi thahnemngaite hetiang hunah hian che chhuak thei thin se alawmawm ngawt ang.