Dedicated 2 ma Homie O.P(Rest In Peace)

Ka thianpa kawm ngeih ve tak James Lalawmpuia aka O.P-a, kum 25.1.2003 a min boralsan hriat reng nan ka buatsaih a ni e, ani nen hian naupan tet atangin kan inkawm a. Thirchhiar kan zawng dun a, kan in threngkah-a, an huana pangkai leh sertrawk kan ei ho thin a, chaw kan ei khawm thin a, B.K.B kan khel dun thin a, nula kan hisap dun thin a, Motor pawh kan bet ru bawk thrin.....ka thriana hian ka hriatloh laiin Drug-a inchiu a lo ching ve a...a nunna hial a chan phah ta a ni e....

God Bless The Dead..

Good Die Young..Rest In Peace

Hei ka pu an kawmna a ngai ngaiin ka dah hmiah mai, a remchang dan a zirin hmun dangah ka peih leh ka la Post leh ang...

PU LALMANGKHAIA SAILO KAWMNA

Thuhmahruai kan sawi tak angin, Chanmari veng Mission Deptt.-a Director leh Secretary ten Pu Lalmangkhaia Sailo an kawmna thu chu i lo ngaihthla teh ang le. (Z=Kawmtu, Ch=Pu Manga)


Z: In awm em? rawn len kan duh a.
Ch: E, lo leng rawh u. Enge in duh a?


Z: Pu Manga te nupa kawm kan duh a, an kawm theih ang em ?
Ch : Kawm theih e a, lengthu rawh u, ka’n ko ang e.


Z : E, ka pu, in dam maw ? “Khamrang Lal, Vandawta a awm laia Thlarau mite humtu an la dam” an ti a; rawn kawm che u kan tum a, kan lo leng a ni. Thu zawh duh che u kan nei nual a, a rem ang em ?
Ch : Rem lohte chu a awm dawn em ni ? In thu zawh duhte kan hriat zawng a nih ngai chuan.


Z : Kan zawh duh che chu in chanchin a ni a. In chanchin hi thangtharte tan leh Thlarau mite tan hriatreng tlak a nih beiseiin, a bul deuh atanga zawh che u kan duh a ni.
Ch : Kan kumte a lo tam ta deuh a, in hriat duh zawng kan hre thei ngut angemaw chu aw ? I han inkawm teh tak ang u hmiang; keini chanchinte zawng hriat reng tlak anih phei zawng a rinawm loh ang e.


Z : Kan han zawt tan nghal mai ang che ang a :- I hmingpum leh i thlahtute chanchin min han hrilh phawt mai teh.
Ch : Ka hming chu Lalmangkhaia Sailo a ni a, ka pa hming chu Lalsailova a ni. Keifang-ah te, Hmunpui-ah te, Thangnang tlang-ahte a lal a, Thangnang tlang-a kan awm laiin, Sept. 5,1908 khan ka pa chuan min boralsan a, ka nuin a ai a awh ta a.


Z : Chu ka pu, i thu han pawtchat lawk ila : I Nu chu i Pa ai han awh thei mai a ni a, i Pa ai chu engtiziaa i Nu chuan awh mai thei nge a nih ? Nu fing tak a nih chu.
Ch : Ka nu chu Darchawngpuii a ni a, ka Pa hian unau pakhat chauh a nei a, Tlang dang a lo thut tawh si a, keini unau kan la te si a, ka Nu chuan ka Pa ai chu awh lo thei a ni ta lo a ni. A fin bik vang zawng a nih ka ring lo.


Z : I Nu chu a fakawm hle mai a, i Pa min hrilh tawh a, min han hrilh chhunzawm zel teh khai, ngun deuhvin kan lo ngaithla ange. Hetiang hi hre thui thei an vang teh a nia.
CH : Ka Pu chu Buangtheuva Darlawn Lal a ni a, a Pa chu Vanhnuailiana Tualte lal a ni a, a Pa chu Lalsavunga a ni. Ani hi Aizawl-ah leh hmun dang dangah a lal a, Aizawl hi a hmingthanna ber a ni a; Saitual-ah a lal laiin a thi a. A Pa chu Lalpuiliana a ni a, Zopui-ah a Pa tlang a thut a ni awm e. A Pa chu Lallula Zopui lal a ni a, chumi Pa leh chu Rohnaa a ni leh a; chungte chu ka hriat theih chin chu a ni.


Z : E khai, i hre thui theiin i hriatna a la tha hle mai a. Kum engzat chiah nge i nih tawh a, ka Pi pawh hi kum engzatnge ni ve tawh chu le? min hrilh phal chuan min han hrilh nghal la kan va ti ve.
CH : Kum 88 ka ni ve ta a, 1899 March thlaa piang ka ni tiin ka Nu-in min hrilh. Tin, kan Nu hi chu 1901 January 13 khan Aizawl-ah a piang a, kum 86 a ni ve tawh a, a hming chu Sangkungi a ni.


Z : A ni maw? in kum pawh a tam tawhin in la chak hle si a. Han inzawt ta zel ila, min hrilh phal ang emaw? Keifanga piang i ni a, ka Pi hi Aizawla piang a ni a, engtinnge ka Pi nena in inchhar dante pawh hriat a va chakawm ve maw le?
CH : In thu min han zawh duh chuan rilru te pawh a tithar hle mai a. In hriat duh miaute chuan inhrilh phal loh theih em ni ang? Baktawnga kan awm laiin 1916 leh 1918 khan lehkha zirin Aizawl-ah ka awm a; ka lehkhazir lai chuan ni khat chu - I Pi hi Aizawl Mission Veng-ah ka hmu a, ka nupui tur ni than hian ka hria a, nupui neih lah ka la tum si lo. Kum 1919 khan lehkha ka zir ta lo va, a Pa nen lehkha kan inthawn zeuh zeuh va; Palai dang pawh nei chuang lovin 1919 March ni 1 khan Aizawl Mission Veng Presbyterian Biak In-ah Pastor Chhuahkhama kutah kan innei ta a ni.


Z : A ngaihnawm takzet mai e. Ka Pi, ka Pu thusawi chu a dik em? (kan nui tlang a) Vawikhat tal inbiak falna in nei lo maw, thangthar ho hian kan awih dawn emawni le?
CH : In lo len azarah i Pu hian nupui tur hmuh-in min lo hmu tih tunah chiah a ni ka hriat ni. A thiante nen kan inah an lo leng thin a, pasal tur en pawhin ka en ngai lo. Ka Pa-in, “Nei rawh, i tan a tha ang,” a tih avangin ka nei mai a ni. Pathian samsuih zawng kan lo ni ngei a ni ang chu, hei tarkunin kan innei ta chu a ni a.


Z : A ni tak maw? in lawmpuiawm hle mai. Ka Pu chu Baktawngte i la sawikai ta deuh deuh a, kan lo hriat danin Khamrang lal, Vandawta a awm laia ‘Thlarau mite humtu’ niin an sawi si a; Khamranga in lal tak dan te, Vandawt-a in awm si dante kan va hre chak ve?
CH : Thangnangtlang atangin Baktawng-ah kan kai leh a, Baktawnga kan awm laia fa 4 ka neih hnuin 1927 khan Pery Sap-in Khamranga lal turin min ti a, 1928 khan Khamrang-ah chuan kan chhuk ta a. Khamrang chu a lo phai deuh va, kan fate an dam theih loh avangin Bawrhsap hnenah khaw siamna tur tlang ka dil a; Zanlawn lal Mangthawma (Ralte lal) ram, Vandawt-ah 1930 khan khua ka siam ta a ni.


Z : A nih tak chu. A nih leh fa hi engzat chiah nge maw i neih le, tin, i thlahte hi engzat chiah nge ni tawh chu le?
CH : Pathian malsawmna kan dawng khawp a sin. Fa hi 13 ka nei a, mipa 3 leh hmeichhia 10 an ni a; 7 an la dam a, naupang ber pawhin fa 3 a nei tawh a. Ka thlahte chu 100 vel an ni tawhin ka hria.


Z : Tu leh fate thu-ah pawh i lo ropui hle mai. A nih leh ka pu, kan zawh duh tak pakhat kan sawi thlen hmain, i chanchin kan lo hriatdan hi a dik reng em? ‘Hatkora (Serthur) hi pum 17 a ei’ an ti che a, i ei meuh em?
CH : A ni tak maw? Ka ser ei kha a mak khawp mai: Kan ramvahnaah Hatkora hi a lo rah teuh mai a, ser ei pangngai hian pum 10 chu ka han ei a, ka la kham ta lo va. Ka hmui chu a pilh vek tawh a, mauburah a tui chu ka sawr ta a, pum 12 tui ka in zo leh vek a, pum 22 ka ei zo tihna a nih zawk chu!!


Z : A ropuiin a mak hle mai a! i kuate a khawhin i khuate a sik phah hial lo maw?
CH : Engmah ka ti lo. Vawikhat pawh ka thian-ten, “Vuakdup pum 10 ka ei a, ka khua a sik/ka ek a tang” an ti a. Vuakdup, a lian thlan pum 10 mu ka dawlh vek a, engtinmah ka awm lo. Ei lam han sawi takah chuan, vawikhat pawh ka ramvahnaah bawk, Chengkek pum 7 hi ka hmu a, ka ei zo vek a, ka la kham ta lo va; ka Ha pawh a tim lo, a dang a awm tawh miau si lova kham awmin ka awm ta mai mai a ni. Pathianin min lo siam tha em bik a ni ber e.


Z :- A lawmawmin a bengvar thlak hle mai. Kan rawn kawm duhna chhan ber che chu; Tunlai hian mi thil chik mite chuan, Pathian tihna neia, Thlarau mite lo humtu leh humhalhtute khan an tuchhuan thlengin Thlarau malsawmna emaw, Leilung malsawmna emaw an dawng zel nin an sawi thin a.Chuvangin Thlarau i chan dan te, Thlarau mite i lo hum dante hi hriat kan chak ber a; engtik kumah nge Pathian Thlarau hi i chan a, engtin nge nangmahah a thawh dan ?
CH :- 1930 kuma Vandawt khua kan kai kum, Krismas dawn atangin Pathian Thlarau dilin kan tawngtai thin a. 1934 Krismas lai khan zan khat chu : tahna keimahah a lo thleng a, ka tap ta hawm hawm mai a. 1936 February ni 8 khuan hmasa vel lai khan zaikhawmnaah ka thinlungah khurhnain min rawn man a, kei chuan, “Pa atanga Thlarau dik tak chauh ka duh, keiin a dik leh dik lo ka hre si lo va, a dik lo min pek chuan a mawh i phur ang” tiin ka tawngtai ta a. Ka thinlunga khurhna chu a zual deuh deuh a, namchhuah ang dawrh hian ka lam ta a; tun thleng hian ka lawmna a chuai ngai ta lo a ni.


Z :- A ni maw? A nih ka pu, tawnghriatlohte hi i dawng ve em?
CH :- Dawng ve e, ka lam atanga reiloteah Thlarauvin a tawngtir ang zelin ka lo tawng ve tawh a, tun thlengin ka la nei a ni.


Z :- A nih leh, Thlarau changtute khan engtik atangin nge hnawhchepna in lo tawh a, hnawh chhuahnate in lo tawh tawh chu le?
CH :- A ni tak asin, khang hun lai kha hriat atan a tha khawp mai. Missionary Sap ten Bawrhsap hnenah, “Mihlimho hi an tha lo,” tiin an hrilh a. 1935 vel khan Peter Sap-in, “Mihlim ho hi tihreh vek tur a ni, tihreh loh buaina siam an awm chuan Rs 50 thleng chawitir theih an ni ang,” tih Order, Lalho zawng zawng min pe a. Chuta tang chuan Lalhoten mihlim chu an khuaa awm atan an duh ta lo va; chulai atang chuan hnawhchep leh tihduhdahin an lo awm ta a ni.


Z : Ka pu, chutia i lalpuiten mihlim an hnawhchhuah chu i lo hum ta zel a maw?
CH : Mihlim ka lo ni miau si a, ka khuaa lo tlanlutte chu ka lo hum zel mai, hum lo thei ka ni lo. Bawrhsap thupek ai chuan Thlarau ka Pa ka hlau zawk miau si a.


Z : Chutia lal dangin an duh loh, i khuaa lo tlanlutte i lo hum tak zel siah chuan harsatna i tawk em?
CH : Pathianin min hriat avangin engmah harsatna tawkin ka in hre lo. Lal hlim ka lo nih ve avang leh ka hlimpuite ka lo hum avangin ka lalpuiten min hekin, mihlim ka lo hum ngeiten min hekin leh, Darsavunga ka lo hum avanga Reiek lal, ‘Lalluai’n a khing ngei ang che,’ min titute awm bawk mahse, Lalpan a mite humtu chu min hum a, ka lawm khawp a sin.


Z : Chutia an heknaah che chuan vauna emaw chhalhna emaw tal pawh i tawk lo maw?
CH : Mamkawnga, hlimna duh ve, Sentlang khua, Nisapui lal Hrangluaia'n a hnawhchhuah ka lo humin, ‘Kan lalin Kohhranah thu a nei,’ tiin Bawrhsap hnenah min hek avangin, Maccoll Sap-in Nausel Bangla-ah min ko va. Sap chuan “Hlimna buaiah i tel ve em?” tiin min zawt a. Ka pu, hlim chu ka hlim, mahse ka buai ve lo, ka ti a. Sap chuan, “Superintendent ka nih hi min cho suh,” a ti a, a thin a ur hle mai a. Min zawt leh thin a, ka chhan dan ngai rengin ka chhang si a; min khingtu chu a ko ve ta a. “In lal hi Kohhran upa a ni em?” a ti a. Mamkawnga chuan, “Ni lo” a ti si a. Sap chuan, “In lal hi Kohhran upa pawh a ni si lo, engatinge, ‘Kan lalin Kohhranah thu a nei’ i tih? engvanginnge ka hrem loh ang che? Khamranga i Buh chhipzawn khu thla 1 chhungin in nupain in thiar zo vek tur a ni, in thiar zawh loh chuan in thiar bak zawng chu in lalin a nei ang” a ti ta a.


Z : Ka pu, a nih leh Lalluaia chuan a khing ta che em?
Ch : Khing lo, chulam han sawi takah chuan Nisapui lal Hrangluaia’n Bawrhsap hnenah, “Vandawt khua an lal hovin a khuain an hlim a, Pa be thei 19 an awm a, an lal pawh Pa be thei a ni,” tiin min hek a. Bawrhsap chuan C.I Suakhnuna a rawn tir a, “Hei ka pu, Hrangluaia'n a hekna che hi ban theihna a ni a, engtin nge i chhan dawn?” tiin min rawn zawt a. Kei chuan kan khua hi kum 3 kan hlim ta a, ka khuate hian thubuai vawikhatmah an la nei lo, kan chan ang hi Hmangaihna Thlarau a ni a, Zoram khua zawng zawng leh an lalte hi hlim vek sela, thubuai rem tur pawh kan nei lovang, tiin ka lo chhang a. Bawrhsap hnenah engtinnge a thlen? ka hre lova, a reh ta vang vang mai a ni. Lalpa’n thu a sawi leh ta, ka ti mai.


Z : Chu a ngaihnawm takzet mai a, sawi tur dangte i la nei lo maw?
CH : Nei bawk ang chu. Mission Sapte nen kan inkawmnate chu sawi lo mai ila; vawikhat chu Peter Sap-in Tawitaw Bangla-ah min ko va, “In khua hi in hlim em?” tiin min zawt a. Hlim e, ka ti a. “Anih leh nang i hlim em?” min ti leh a, Hlim e, tiin ka chhang leh a. “I hlim chuan engtin nge i awm?” min ti leh zel a, ka pu, ka Lu-te ka thing a, ka kutte ka thing a, ka ti a. “Lal chuan tih ve hauh tur a ni lo, tihreh vat tur a ni,” a ti a. A tukah chuan kan khuaah a lo kal a, mihlim hnawhchhuah veng a han hmu chu “Misualho, tihreh vat tur a ni,” a ti a, a thin chu a rim hle mai a; engtinmah chuan min hrem lo. Kei lah chuan tihreh ahnekin lo darhzau deuh deuh se ka duh si a.


Z : I lo huai hle mai, Thlarauvin huaina a pe che a nih dawn chu. A nih leh mihlimin, ‘Hriatna ka dawng’ an tih angte hi i dawng ve em? hriat te i nei ve em?
Ch : Dawng ve nual e. Kan sawi seng lo anga, Pahnih-khat chu ka’n hrilh ang che u: Thlarau chuan, “Khuangtuaha khi hlau viau rawh, Zawlneider a nih khi, amah leh a hote khian an thil chin khi an sim loh chuan ka chhandam loh tur an ni tih ka hriattir lawk a che, hlau lovin sawi sawi rawh” min ti a ni.
Tin, 1946 September thla khan Thlarau chuan, “Wales Mission atangin chhuak rawh” min ti a ni.


Z : Chu, Thlarau hriattir ang che chuan Wales Mission atang chuan i chhuak ta nghal mai em ni?
Ch : Chhuak ta nghal mai e, Thlarau hriattirna hi hnial ngam chi rual a ni lo, tih hi ka hre tawh miau si a. 1947 khan Khamrang-ah Thlarau Biak In kan sa a, kan chhuak ta nghal mai a ni.


Z : A ni maw? chutia Thlarau Kohhran Biak In in din tak mai chuan engtinnge in inrelbawlna dante chu hriat kan va chak leh zel ve.
Ch : Kan inrelbawl dan chu Thlarau zarah a fel khawp a sin; Kohhran inrelbawl dan diak hian kan inenkawl a, Thlarau thu a lal ber.


Z : A nih leh, chutia in awm tak chuan engtinnge in kal tak zel?
Ch : Kan kal zel dan pawh a mak khawp asin. Khatia mihlimho inbawkkhawm tate kha khatianga kan awm ngawt mai kha chuan a tha lovang, Aizawla ka kal hunah Zakamlova ka bia ang a, ‘America ramah Thlarau kohhran an awm’ an ti a, lo zuk zawng turin ka sawm ang e, ka ti a, ka \hiante pawh chuan tha min tihpui a. Biak In kan sak hnu kum 1 leh a chanve hnuah Aizawl chu ka kal ta a, Zakamlova chu ka bia a. Hei kan khuaah chuan Thlarau Kohhran kan din ta a, Wales Mission atangin kan chhuak ta, Biak In pawh kan sa tawh a, i duh leh lo tel ve la, i tel lo pawhin kan ding dawn tho va, ‘America-ah khuan mihlim Kohhran an awm’ an ti a, fimkhur takin lo zuk zawng ta che, tiin ka chah a.


Z : A nih ka pu, Pu Zakamlova chuan a rawn zom ta nghal mai che u em ni?
Ch : Aizawla ka kala ka sawm tum kha chuan min rawn zawm nghal mai lo. 1948 October 5 khan khaw hrang hrang mihlimho kan inchah khawm a, Aizawl Dawrpui Sikul tualah kan inhmukhawm ta a; chumi tum chuan Zakamlova chu a rawn inziaklut ve ta a ni.


Z : A nih tak chu! Chu ka pu, Aizawla in inhmuhkhawm chuan hruaitu in nei em ?
Ch : Nei e, mi thenkhatin an sawi ang mai hi chu kan ni lo a sin. Kan chairman chu Zakamlova a ni a, kan ziaktu chu Lalphunga Sailo a ni.


Z : A lo nih tak chu le; Pu Zakamlova chuan a sawm ang chuan America-ah chuan Thlarau Kohhran chu a zu zawng ta em?
Ch : Zawng ta e. Doveri te puihnain U.P.C a zuk hmuchhuak a, 1950 February ni 19 khan Aizawl khuaah Kohhran chu a lo ding tan ta a. Rawngbawltu indaih lohna avangin ka khuaah chuan 1951 khan Pastor Bawihtanga kuta Baptisma changin U.P.C chu kan lo din tan ve ta a ni.


Z : Anih leh ka pu, in khuaa Kohhran in din tirh lai chuan Member engzatnge in nih?
Ch : A rei ta deuh a, kum a lo tam ve ta deuh bawk nen; a dik tak chu ka hre ta chiah lo va, 70 vel chu kan ni ngeiin ka hria.


Z : A bengvar thlak hle mai. Kan la hriat ngai loh thu tam tak min hriattir a, Thlarau duh Kohhran chu UPC chu lo ni ta tehreng sela engtin nge Baptisma in chan duh mai a ?
Ch : Baptisma te chu Bible hian, “Sual ngaihdam nana chan tur’ a lo tih miau si avangin chang ngei turin niin kan inhria a, hnialna reng kan nei lo.


Z : A nih ka pu, Baptisma i chan hnu hian nangmahah inhriatfiahna thar i nei em?
Ch : Sawi tur tam tak a awm ang a, mahse ka’n sai duh chu: Pathian thu hi ka hrefiah ve tial tial a, Isua hi Pathian a ni a, khawvel leh thil zawng zawng siamtu, kan aia thi tho leh a, min hruai tura lo la kal leh ngei ngei tur a ni tih ka hrefiahin, chu chuan lawmna leh thlamuanna thar min siam a, vawiin ni thleng hian ka thla a muang em em a ni.


Z : A ni tak maw? kan mi hmasate hian Thlarau zarah in lo hmufiah hle mai. Thudang deuh han inzawtkai leh ta daih ila: Pathian hnena Ran talhna lamahte hian ‘A thilphal hle mai a, mihlimhovin ‘I talh a tul’ an tih chuan talh leh mai thin,” an ti che a. Nangman tul i tihna atangin engzatnge i talh a, ‘I talh a tul’ an tih avangin engzatnge i talh? hriat a va chakawm ve.
Ch : A hun a rei ta deuh a, hrilh dik loh palh che u pawh ka hlau hle mai. Dik ngeia ka hriat dan chuan, Lalpaa ka lawm avanga kan talh chu Bawng 5 leh Vawk 7 ni tain ka hria. Tin, Pu Tumbilan Vawk a thawh tumin, “In thawh ve a tul” an ti a, Vawk kan thawh ve a. Vawikhat leh chu kan nu hian nau a mutpui a; keini mihlim paho inkawmkhawm chuan meilum kan ai a. Kan nu lo thangharh chuan “A va mak em! Vawk rawhna tulin min hawlh min hawlh mai” a rawn ti a. Chuveleh kan thianpa Berha chuan, “Ka u, ka va lawm em, thinlungah a lang a, ka sawi ngam si lova; a ti a, a ding ta hluai mai a. Kan thawh ta a. Chu nen chuan mihlimhovin “Tul” an tih vanga kan thawh chu 2 a ni ta awm e; kan sawi sual palh leh Lalpan min ngaidam se.


Z : E, a va ropui vele, thil tih that leh thilphal chu in theihnghilh lo hle mai a. Kan ram tan hian thuchah turte i nei emaw chu?
Ch : Nei bawk na a, mahse thu pakhat chauh han sawi ta ila: C.I. ka chhanna ka sawi tak ang khan, kan ram hruaitute leh mipui te hian Paa chhuak Thlarau dik tak hi changin, a hruaina hi awih thiam thei sela, kan ram rorelnate hi a dikin, hlemhletna te, thamna te, duhamna bawlhhlawh tak tak te hi a lo bo ang a, thubuai rem turte a awm lo ang a, a nuamin leh a hlimawm dawn em avangin kan ram hruaitute leh ram mipuite hian Pathian Thlarau Thianghlima hlim hi duhin chak theuh se, tih hi ka chah duh berte chu ni mai teh se. Hei hian a funkim ber maiin ka hria.


Z : A nih leh hei, tarkunin UPC-ah in awm ta a ni a, Kohhranhote tan thuchah duhte i nei em?
Ch : Kohhran tana chah ka duh ber mai chu: Kohhran kan dintirh lai angin Isua lam ena hlawh ngaihtuah lovin, Thlarau bo hmangaihnaah leh Kohhran inhmangaih tawnnaah hian kal zel sela ka duh ber a ni.


Z : Ka pu chu i upa tawh hle na a, kan ram leh Kohhranho tana chah awm takte pawh i lo khawlkhawm tha hle mai. Thuchah lam han sawi takah chuan, i tu leh fate tan bik hian chah duh bik riaute i lo nei rengang a? I neih chuan min han hrilh zel teh.
Ch : E, A ni tak asin, ka Tu leh Fate ka chah duh ber mai chu: Lalpa thu hian khawvela kan nun kawng leh chatuan nun thlengin a huap vek mai si avangin Lalpa min hriattir angin ka tu leh fate hian chhandamna an chan theih nan ka tawngtai thin tih hi an hriat ka duh a; Lalpa Thlarauin min hruai zel ang hian rawn kal ve vek sela ka duh a, chhandam ni vek sela ka duh a ni. Chu chuan khawvel nun kawngah leh chatuan thlamuanna an neih phah tir ngei ka ring si a. He thu te hi ka chah duh chu ni mai teh se.


Z : Awle, kan lo leng chu a bengvarthlakin kan lawm hle mai. A nih leh ka pu, kan inkawmna thu hi Lehkhabu atan buatsaih ila, Thlarau bo chhandam nana sum tuak nan buatsaih ta ila, kan zinga rawng i bawlnate pawh a ni dawn lawm ni? Rem i tih zawngte a ni emaw chu?
Ch : Chutia kan inkawmna thute a bua siama, Thlarau bo Chhandam nana hmanruaahte a lo chan theih dawn phei chuan remtih loh thu a awm dawn em ni? Buatsaih ula a that dawn chu; tangkainte pawh kan neih tawh loh hi. In lo leng chu a lawmawm hle mai a.

** Kan lo leng chu keini tak a nia lawm ni, kan thil la hriat ngai loh chanchintha tak leh duhawm tak tak kan rawn hriat phaha; tin, lehkhabua siam te pawh min remtih sak leh ta zel bawk nen kan lawm tak meuh a ni. Lalpan chakna pe chu u-in, malsawmnain vur zel che u rawh se. Kan tin tawh mai ang e.

Mizo Gospel Band Magdalene

Now i'm with Gospel Band Magdalene in their Jam Room...


With ma good fren Victor 'Tha Guitarist'

Hip Hop Leh Mizo

Tun tum chu nidang ang lo takin mahni ngaihdan leh hmuhdan te kan ziak tel nuaih mai teh ang, eng hi nge Hip Hop chu ti kan la awm em aww? Kan la awm takin a Basic chauh sawi leh ila, Hip Hop hi Cummunity/Culture anga sawi thin a ni a, chutah chuan M.C (Master Of Ceremonies), D.J (Disc Jockey), B.Boy(Break Boy) leh Graphitti Art’s te bakah a kaihhnawih Beat Box te hi a tel ti ila kan sawi sual tampui awm love. M.C chu a chham tu ho hi an ni mai a, D.J lah chu Music lo sawngbawl kual vel tu hi an ni leh mai a, B.Boy kan tih chu mawi dangdai taka lo lam kual zak zak ho hi an ni thung a. Graphitti chu bang vela lemziak mawi awmze nei tak tak ang chi hi a ni ve thung a, Beat Box han tih chuan ka hmanga Music siam chawp ang chi hi a ni mai awm e. Mizo tam zawk hian Hip Hop hi kan hmu sakhi viau ni hian a hriat a, a chhan ni bera lang chu T.V vela Rapper te Video Sxy tak2 vang te pawh hi a ni mial mahna.

Helam(Aizawl)-a Rap ka tuipui ti ve ngawt ho lah hian enge Rap chu a nih a, enge Hip Hop chu a nih pawh an hre hlawm si lo! Chanchinbumi tam tak lahin zai ve zuah zuah satliah Rapper an lo ti ve ringawt zel bawk nen, Aizawl-a Rap Music ngaina zingah Drugs Addict an lo tam phian bawk nen hian Rap hi helamah hian kan hmu sakhi viau ni hian ka hria a. Rap chu Rythim And Poetry emaw Rythmically Accentuated Poetry tihna a ni mai a, kum 1960 tawp lam leh 1970 chho vela rawn irhchhuak a ni a, Hip Hop Cummunity -ah hian hnam zawng zawng an leng vek a. Mihang ho tan chauha tih bik pawh a ni kher lo, African American’s te hi Negro ti lovin mihang emaw Black American ti a koh thin ching tawh ila kan chanchinbu ho hi kan changkang sawtin ka ring.

Mizo Zingah:- Hei a chham lam chu kan hmelhriat ve ta khawpin a lang, Rapper ka ni e ti ngam pawh an awm ve nual tawhin a rinawm bawk. Hmasawnna zel a niin a lawmawm viau, mahse he Community duhawmtak leh thangduan tak ti hmelhemtu hi chu nih i tum lo hram ang u.

Hip Hop Culture-ah hian heng Drugs, Gang-Bang, Sex te hi a bet lo va, Rapper thenkhat an rawn chhuahna hmun duhawm lo tak tak ten an rawn ken tel te a ni thin zawk. Raper tam zawk te hi kawtthler tawp tak atanga rawn chhuak an nih avangin an entawn tlakloh hlawm hle a, chutih rualin hetiang hmun atanga seilian entawn tlak leh ngaihsan awm tak tak an awm ve tho bawk. Rapper’s te hian an mahni hian tawng hran deuh bik an nei a, chung an Slang hman te chu mipangngai tan chuan hriatthiam pawh a har thei fu. Raper tha tak chu Freestyle lamah pawh an nep lo khawp mai, khawvela Rapper tha ber ber te hi Freestyle-ah pawh an duai lo hlawm thei hle.

Mizo te hian Rapper leh Per-lo hi kan la hrehrang lo hle hian a hriat a, Disco Music lama hriat hlawhtak Dr.Alban te pawh hi han ngaihthlak tir ila Rapper thiam tak a ni kan ti fur hlawmin a rinawm.Rapper zingah Pathian thu lam hawi zawnga chham an tam tehchiam lo va, a tam zawk chu Revolutionary Idea’s lam hawi zawng hi a tam hle a ni. Old School Rapper M.C.Hammer khan Pathian fakna hla ang chi ‘Pray’ tih te a larpui hle a, ani bakah hian Run DMC ami Rev.Run a ber hi Pastor an tih ang hi a ni bawk.

A lam lamah han lut leh ta ila, Mizo zingah B.Boy an awm ve reng em? i ti a ni mai thei. Ka chhanna che chu awm e tih a ni, tunge a? i ti a nih chuan John A.K.A Spikey tiin a chhang leh nghal zat ang che. Mahse, ani hi India ram chhuahsanin tunah hian hmundangah lehha zirin a awm daih, B.Boying leh ruih theih thil hi engtilai mahin a kalkawp thei lo tih hi chhiar tuten lo hre tel ula a duhawm hle ang. Rap leh ruihtheihthil chu a kal kawp theihna lai a awm ang, mahse Breakers tan chuan in Fit taka awm angaih avangin ruihtheilh thil tihchu sawiloh ei tih that a ngai zawk tlat. Mizo B.Boy chu a chanchin ka hrilh tam thei lo vak lo che u, a chhanchu amah hi lehkha zirlai a nih avangin mi hriat tam a duh vak lo a ni. B.Boy han tih ringawt hi chu engemawzawng takin dik hlel deuhna lai a awm thei a, chu chu B.Girl an awm ve theih vang a ni. B.Girl chu an ti ve thin thova mahse, Common Group ang deuhin B.Boy an ti sam et thin. Hmeichhe tan pawh Break hi a tih ve theih thova, hmeichhe Breakers tha tak tak an awm ve nual a ni. Mizo hmeichhe zingah Breaker an awm ka la hre lova, hmeichhe tan hetiang lama tui chuan mahni pawhin a in zir ve theih lutuk a ni. Kan sawi John-a pawh hi amahin a in zir chhova, tunah chuan Bon tawh tak a ni. Breakers tha ni tur chuan Practice hnem a ngai hle a, Breakers tha tak pawh a Practice tlem chuan a che a hmuhnawmloh ve thei bawk. John-a hi izawl.com ah pawh Member rinawm tak pakhat a ni ve a, izawl.com/misual.com i Visit a nih chuan a Username chu Spikey tih kha a ni e. B.Boy tih tawngkam hi Kool Herc-a chherchhuah a ni a, Bronx Boy tihna a ni e ti thin mahse Kool Herc-a’n Break Boy a tih vangin Break Boy tihnaah pawm a lo ni ta zawk a. Kool Herc hi nikum Vh1 Hip Hop Honor-ah khan an chawimawi nghe nghe kha, khami tum han B.Boy Group lar ta Rock Steady Crew te pawh an chawimawi ha. Rock Steady Crew te bakah hian Group dang tha tak L.A.Breakers te pawh an la awm.

B.Boy lam duh tawkin D.J lam hi lo en leh ta ila, Mizo te hi India ram hmun hrang hrang bakah hawvel hmun dang danga inzar pharh kan ni a. Heng zingah hian D.J tih ve theih chu an awm ve tawh maithei, an awm leh awmloh ka la hre chiah lo? Graphitti lamah pawh chiang taka han sawi theih mai chu an la awm lo pawh a ni maithei, mahse kut themthiam tak tak leh Idea tha tak tak neia thilziak thiam Mizo thalai zingah hian an tam tih chu a hriat. A then te chu College dawhkana an thil ziak atang ten a hriat theih a, a then te chu an thian te kawr hmaa an thil ziak atang te pawhin a hriat theih bawk a. Hetiang Talent tha tak tak te hi tihpun zel theihdan tha zawk hi awm se a duhawm ngawt mai, an thalai helam tui tak tak te an awm nual awm si a. Hawh u Hip Hop hi hmu sakkhi nghal ngawt lovang u tih hi chhiar tute hnena ka chah duh a ni a, Hip Hop Star zingah entawn tlakloh tam tak chu an awm ngei mai. heng a entawn tlakloh ho hi chu a en dan tawk thiam ila, Role Model atana tha tak tak awm te hi i hmuhhmaih lovin entawn zawk ang u hmiang. Tihian kan sawitum tlangpui chu kan sawi lang a, ziah tur a la tam viau naa chu duhtawk tawh phawt mai ang. (hei hi nikum 2005 vela chanchinbu-a ka ziah a ni a, ka Blog ruak hnawhkhahna atan a tangkai ringin kan dah ve anih hi)

Wit ma fren Dr.Mali

Kan mizia leh tunlai khawvel

Mizo te hi thil engemaw buaipui hluai leh vei tlut ching kan va ni teh reng em! Faktea vanglai kan la hria anga Mimi vanglai kan hre leh anga, Sailova te vanglai pawh sawi tam angai awm love. Anni ho lar lai hian kan bawh huam huam a, mi thenkhat chuan an Pathian biak lo chauh a ni hlawm tak kha. Hei tun hnaiah pawh Lalruotmawi an tih, keichuan Pu R.Vanlawma tihdan ang deuha Lalruatmawii tia ka lo ziah ve hmiah thin chungchang hi han thlur ve deuh ila. Saw lamah chuan duh leh Lalruotmawi pawh lo ti mai mai rawh se, kei chuan Lalruatmawii ka ti tho tho. He nula hi Lengpuia arawn thlen hma daih atang tawhin a lar tawh hle a, amah ngaisangtu zingah pa upa lam leh pathlawi thlengin an phu suau suau mai kha a ni a.Aizawl chanchinbu hrang hrangah pa vengva deuh china ngaih thlengin an seprawtui a, amah ngaisangtute zingah hian a zaithiam vanga ngaisang leh a taksa mawina leh aduhawmna lam zawnga ngaisang tam tak an awm a. Sangzuala Hmar pawhin Sex Idol a ti bi ta hialin ka hria, Pu Ramhluna Hnamte pawhin a Article ziakah Routmawi Mania te a ti hial bawk a nih kha maw. Hmelchhe hang nilnel chal bawk ve tak nise Patling leh pathlawi tam zawk te hi chuan heti em em chuan an ngaisang dawn em ni aw? te ka ti mai mai a, a zaithiam tih chu a zai ngaihthla hian a hriat theih mai awm e.

Ruatmawii ngaisangtu hi chi hran hran an awm awm e, a hmasa berah chuan amah tih tak taka a zai vang leh a thiam bik vanga ngaisangtu an tam niin a lang. A dawtah chuan ama mimal nun hrim hrim avanga ngaisangtu pawh an awm ang, hei lo lehah chuan amah ngaisang tute chu mi lungleng leh khawhar tak tak Pathian ram ngaia kur kur te an ni kan ti leh thei awm e. Zep nak emaw amah ngaisangtute zinga tam tak chu patling leh pathlawi bakah tlangval zingah pawh amah lo it a, laikhum thlehnem lo belhpui chak te hi an ni kan ti lo thei lo. Ruatmawii ngaisangtu dang leh te chu mi ngaihsan leh buaipui zawng lo ngaisang ve ngawt thin tute an ni leh, hetiang mi hi kan Zoram khawvelah hian tam tak an awm. Hetiang mite bawh zawng leh buaipui zawng ngaihsan lo tum ve phet chi hi awm ve reng a ni a, ze nghet tak an nei duh lo chawk. Mizo mipui zingah hian mite tuipui zawng leh ngaihsak zawng apiang lo tuipui ve a, a engamah hmaa mite buaipui anih avanga lo atchilh ve ngawt zel tum hi an tam viau awm asin!

Ruatmawii chanchin hi chanchinbu hrang hrang a ziaktu tam ber chuan amah selna lam an ziak hat hle a, hranghlui Band ka ngaihsan ve tak Zodi ami T.Zorampela khan vawikhat chu Ruatmawii hla sak dan hi tlem siamrem ngai lai a awm niin a rawn thailang zauh tawh a. Hemi tihloh chu amah leh a chhungte tana chhiar nuam tak tak tur chi hlir a ni, Pu K.L.Liana pawhin a chanchin a lo thlen hma daih atang tawhin a lo ziak a. Ruatmawii lo thlen ni pawh khan Lengpui Airport-ah Pu K.L-a hi ha hni dai dup awma mawiin Ruatmawii hmaa a then deuh tha a nih kha. Ka kal ve lem lo a chu T.V lamah ka lo hmu fuh hlauh pek a, ani bakah hian dan lama kan mi hriathlawh Pu Rualkhuma Hmar Advocate pawhin Ruatmawii chanchin ziahna chu a bu a siamin Rs.30 in a hralhchhuak nual a nih awm a. Ruatmawii chanchin ngaihven tute tan chuan Pu Rualkhuma lehkhabu chhuah hi a man hla ngawt ta ve ang te ka lo ti ve mai mai a, kha lehkhabu kha kei pawhin thenawmte inah ka hmu fuh ve hlauh a. Chhiar ta lem lo chuan Pu Rualkhuma thlalak te tak te a tit lama chuang chu ka en ta vel mai mai a, lo chhiar ve mai mai ila ni tur te ka ti hnuhnawh mai mai a. A ni, khawhar hla sa Hmar nula an tih fo Mizo nula tih zawk thin tur ni awm tak? zuna patling leh pathlawi tam tak an uai hi keichuan ka thiam lo lem lo, khawhar hla duhthusama mawia a sak theih piah lamah a sa tu nu hi a fu ke ve phian bawk si! a la chawnban ve phian leh nghal a. Hei lo liama Mizo pa tana Idol tur an awm chuang dawn em ni? Keni thalai tuipuiral lam mi ngaisang ve ringawt ho ai chuan an vannei ngawt alawm an Idol an chibai lawp lawp thei hlawm zui a. Chibaina hun remchang nei ve ta lo pawh an awm nual ta ve ang, mahse kan Zoram ngei maiah an Idol Ruatmawii chuan a rawn tlawh bik si a. An va vannei bik em, keini thalaite hi chuan kan ngaihsan ho hi kan damchhung pawhin a takah kan hmuin an chibai pha ve awm si lo.

Mizo Aw 7.1.06 chhuakah khan Pu Rualkhuma Hmar chuan "Tunlai Lalruotmawi zai hi" tih a lo ziak tawh a, hetah hian Ruatmawii hi tihtak zeta zai thu leh a thiam bik thu te, hla thu diktaka a sakchhuah thu leh a sakdan thluk tlema siamrem athat thu rawn tarlangin zaithiam dangte arawn fuih nghal a.

Mizo Aw-ah vek hian ni 21.1.06 chhuakah khan 'Lalruotmawii" tih thupui hmangin K.Hrangluaia Mission Vengthlang chuan Article a ziak a, Pu Hrangluaia hian Ruatmawii zaithiam dan leh amah hmanga Zo fate insuihkhawm leh chungchang a ziak a.

Zozam Times ni 27.2.06 chhuakah "Leitlangpui pawh kan kur e" tih thupui hmangin Jorinsanga(Sena) Tlau chuan Article a ziak a, Sena hian Ruatmawii zaithiam zia leh Lunglei lam thleng thlenga alarzia rawn ziakin hla a phuahsak hial a.

Zozam Times ni 3.3.06 chhuakah "Ruotmawi zawhna chhan chak ber kha" tih thupui hmangin Zokailiana Khiangte, Mission veng chuan Article a ziak ve leh a, ani hian zofate kan insuihkhawm leh theihna tur lam arawn thlur a.

Zozam Times ni 9.3.06 chhuakah "Lalroutmawi zun zam" tih thupuia hmangin C.Hermana chuan Article a ziak a, Pu Hermana hian a thawnthu phuah tawh pakhat ami nula Vangkhawmawii chu Ruatmawii nen arawn tehkhin deuh a. Ruatmawii zaithiam za leh zofate insuihkhawm ti leh theitu a nih a beisei thu a ziaklang a.

Pu Hermana Article hnuaiah hian "Ruotmawii, Aw Lalruotmawi" tih thupuia hmangin P.Chawnghmingthanga chuan Artilce ziak ve bawk a, putar lam ni tawh awm tak Pu Chawnghmingthanga hian Ruotmawii zai a en laia a mittui atlak hial thu te arawn taralang a. Ama ziah dan takah amah ai hian Pu K.L-a a lian zawk ni awm tak a ni a, chuti anih si chuan pa lian buang theng thung chu a nih a rinawmloh khawp mai.

Zozam Times-ah vek hian ni 13.3.06 chhuakah khan "Lalruotmawi Vrs Zioni renthlei" tih thupuia hmangin Pu K.L.Liana chuan Article a ziak ve leh a, Pu K.L-a hian India ram President Pu Kalama nena an Hair Style in ang chungchang thuthang awm ang chi chu chawtak khuka khukpui chi a nihloh thute arawn tarlang nual a, tlar thum zai lama Zioni chungnun zia leh tunlai boruakah khawhar hla satu Ruatmawii tawnsan zia te a ziak lang nual a.

Ni 6.3.06 Vanglaini chhuakah khan "Pathianin min hrilh a duh a ni em?" tih thupuia hmangin B.Hungliana chuan Article a ziak a, hetah hian Zofate inpumkhat nan Pathianin Lalruatmawii fakna hla sakte a hmang duh nia a hriat thu a tarlang a, Pu Hungliana hian Zoro, MNF, MNA leh Capt L.Z.Sailo hming te pawh a ziaklang nual reng a. Pu Hungliana thuziah hi inpumkhatna duhtu tan chuan a tha lo tih chi a nih hmel loh khawp mai.

Aizawl Thupuan-ah 14.3.06-ah "Lalroutmawii-Ziathiam" tih thupuia hmangin Pu R.Lalchhuana Khatla South chuan Article a ziak a, fapa sun lungleng a nih thu leh Ruatmawii hian a hnem thu a tarlang a, Ruatmawii hlasak dan hi a di thlap nia a hriat thu leh Kristian hla bu-a hla thu tihdanglam chungchang angaihpawimawh thu a ziak lang nual.

Zozam Times-ah chuan ni 16.3.06 khan "Zai mite hi an va hlu em!" tih thupuia hmangin Vanlalkhama, Bilkhawthlir chuan Article a ziak a, Lalruatmawii Album 'Thiemthu hril Thei Kan Ta Nawh" tih a neih thu leh a hla thute chu hrethiam kim phei se chuan nalh a tih viau tur thu a ziak a.

Vanglaini ni 22.3.06 chhuakah khan "Mizoram tan enge kan duh?" tih thupuia hmangin Pu R.Vanlawma khan thu tha tak a ziak a, Pu Vanlawma hian Mizo hnam inpumkhat a duhzia thu a ziak ura hle a.

Hemi ni vek hian Pu Rualkhuma Hmar pawhin "Lalruotmawi zai leh a kaihhnawih" tih thupui hmangin Zozam Times-ah Article a ziak a, hetah hian Pu Rualkhuma hian hnam inpumkhat a duhzia leh lengkhawm zai uar thar leh a duh thute a ziak a.

March 22 hian Zozam Times-ah chuan "Welcome Miss Lalruotmawi" tih thupui hmangin L&R, Vaivakawn tih chuan Artcile a ziak ti tawp mai ang aw(Thanpuii Pa pawhin Mang N Mang tih a hmang thin a ni lawm ni? mipakhat anih loh tak leh a ni lo vin an tihna a ni zawk mai), L&R hian Mizorama zaithiam ten hla thlu an duh ang anga an sawiksa anga Ruatmawii'n a tihveloh avanga ngaihsanawm a tih thu a ziak a. Hei bakah hian Ruatmawii chu mite dangnala tawlh thlu lo tur leh hnam inpumhatna tha zawk siam awnga hma la turin a chah.

L&R vek hian Zozam Times Mar 25 chhuakah "Lalroutmawi" tih thupui hmangin Article a ziak leh a, hetah hian Ruatmawii hi Mizo tawng thiam nal tur turin a fuih a, hei bakah hian Manipur lama Zo hnahthlak awmte pawh chi bing rilru ang chi Mizorama senglut lo turin a fuih bawk.

Zozam Times-ah hian 23.3.06 chhuakah "Lalruotmawi leh thil dang" tih thupuia hmangin R.C.Zosangzuala chuan Article a ziak a, mitin ten an lo lawmdan leh seprawtui dan a di taw lo niin a ziak a, Mizoram zaithiam awm Nancy Zothanmawii, RTC Lalduhawmi te pawh arawn sawikual deuh nuaih a. Cable T.V neitute pawh ram chhunga zaithiamte Promote thiam turin a fuih nghal bawk.

March ni 28 Mizo Aw Editorial-ah Lalruatmawii chungchang leh Mizo te mizia kan hmu a, Mizo te engemaw thil awm changa kan zat ruai leh kan phi vel ruai thin chungchang kan hmu a. Mizo te kan hawndak lutuk em tiin zawhna pawh a tawp lamah a siam hial a nih kha.

Mizo Aw-ah vek hian April ni 3 chhuakah "Lalruatmawi ka hmuak ve" tih thupui hmangin R.Zirkunga, Tuikual South chuan Article a ziak a, Ruatmawii lo thlen ni March 23-a Lengpui Air Port-a dar 11:45 vela an thlenthlak thu leh Ruatmawii thlawhna atanga arawn chhuak lo va hmu hmanhmawh zual fal bik zingah mi hriathlawh tak tak an awm thu te arawn tarlang a. Air Port-a Ruatmawii bawrtu an tam thu te a tarlang a ni. Heng bakah hian kartin chhuak Lelte, Vartian-ah te pawh Ruatmawii chanchin hi hmuh tur a tam hle a, a haw hnu pawh hian a chanchin lam hawi zawng thuziak a chhuak hnem leh malh malh tawh hle.

Media hran hranah Ruatmawii chanchin alang tam hman hle a, aning tawk an lo awm pawhin an thiam awmloh chuang lo. Mi thenkhat ten LPS 'Ka vei zawng' leh Zonet 'Fak selna' vela Mizo nula ni ve lo anga an sawi thin kha chu tha ka ti lo, amahin Mizo a intih chuan Mizo-a pawm mai a tha a ti. Ruatmawii hi a hming ringawt pawh ziahdan a in ang lo nasa hle a, a thenin Lalruotmawi an tih laiin thenkhat chuan Lalroutmawi an ti bawk a. Mizo ten an hriatthiam dan tur ber Lalruatmawi tia ziak hi a fuh ber niin ka hre ve mai mai, duh leh Manipur-ah chuan Lalruotmawi chu lo ti leh ta se la a pawina a awm chuang nang. Mizo hnam hrang hrang Hmar, Paihte, Lakher te chenin inti hrang lova an hnam kan pumkhat hi duhthusam duhawm ber a ni mai awm e, tawng hrang te lo nei pawh nise an Mizo lohna a awm chuang lo. Mahse, in ti teh ang Manipur leh hmun hran hrana Zo hnahthlak awm zingah hian Mizo inti duh lo hi zuk awm fur a, ka thianpa pakhat Manipur lama Ruatmawii te nena School khata kal chuan "Kan School-ah ka u nen chiah Mizo kan awm" zu han ti a. "E! Manipur-ah te chuan Mizo an ram viau emaw Ka tia?"ti a ka zawh chuan "A hmunah khuan zuk awm ve ula in hre chiang mai ang" tiin min chhang leh a, kan sawichhunzawm leh zel naah chuan ka thiana chuan tunah chuan Mizo nih an hreh tawh hlawm bik lo tiin a tlip zui a. Tawng kan neih hran avanga Mizo kan inti duh lo a nih chuan kei chuan an thu thu ka ti mai, Mizo nih duh lo chu ni lo tawp se a ni mai alawm tih hi ka thu vuakthlak a ni ve tlat. Ruatmawii pawh hian Mizo tawng chu a pai ve deuh a, mah se a zai erawh chuan a pai tih a hriat loh khawp mai. Ani pawh hian Mizo tawng aiin Hmar tawng a hmang tam zawk tihna a ni mai a, a pawina a awm pawhin ka hre lo. Pu R.Vanlawma duhthusam ang deuh khan tawng khat hi hmang tlang thei ila chu duhthusam a ni e, eng vangin kan ngaihsan America te khu an changkan chak bik viau kan tih chuan hnam hran hran mihang leh mingo ten tawngkhat an hman vang a ni mai lo maw ka unau?

Hman deuh atanga kan tunlai khawvel thleng hian han thlir ta ila Mizo te hi thil engemaw bawhhuk ching leh ze nghet chet chawt nei lo kan nih zia kan hrechiang hlawm viau awm e, heng kan thil chin than hi kan sim thei tawh lo niin alang. Intihhmuh hnam kan ni pawh ti ila tunge dawt sawiah min puh ngawt thei ang? thil chi hran hran hi kan intihhmuh a. Eng thil nge anih tih fiah/chian hmasa lo vin kan bawh huam huam a, chintawk reng kan nei hlawm lo a ni ber e. Revival Crusade te pawh hi thlarau thianghlim lam aimaha a huau huau leh mite bawh zawng a nih vanga kal ve chak hrim hrim leh a boruak chhim ve duh hrim hrim pawh an tam ngawt ta ve ang, zan dar 12:30 velah naupang te te kawngpuiah hmeichhia leh mipa an rawn inkuah haw ve fir far mai ka hmuh te khan an nu leh pa ka khawngaih hlauh. An nu leh pa te chuan inkhawm tura chhuak an nih avangin an phalsak a, zana an haw har pawhin an hauh a ring chiah lo. An hmuh loh lamah hian thil tam tak hi a inphum a, naupang leh an aia u thalai tam tak hi chuan Chance neih nan heng hun hi an hmang thin tiin sawi ila kan sawisual tampui awm lo ve.

Ruatmawii a haw tawh a, miin an bawh nasatzia kan hmu theuh anga. Chumi hnua Rivival Crusade pawhin chhimtu angahzia chu a hmunah kal ve lo mah ila T.V-ah a lang reng a, kan bawh huam huam tak meuh meuh a ni. Tunlai chhoah tho hian T.V Serial nu leh thalai tam tak bakah Pu K.L-a ngei pawhin a lo en thin Kasauti-a changtute hi Aizawl-ah rawn kal se, bawr tu an ngah leh viau ang chu. Nula chu sawiloh nutling leh nuthlawi tam tak an phu suau suau niin ka mitthlain ka hmu viai viai thei, Mighty M.Jr ho pawhin Kasauti Age-ah kan awm niin an hlaah an sak tak kha maw. Kei chuan heng milar ka sawi lan hrang hrang Faktea, Mimi, Sailova leh Ruatmawii te hi an thusawi leh an zai lai a hmunah ka hmuh ve awm reng ka hre lo! Midangte angin hmuh ve ngei ngei tum chu ni ila chuan ka hmuh ve ngei pawh ka ring, mah se ka la tum rem chang lo laklawh a ni ange te ka ti ta zawk a. Ka mi ngaihsan tak tak zinga mi thenkhat Pu Manzuala, Ruatfela nu, Pu K.L-a leh James Dokhuma te chu vanneiha siamin an thu sawilai ka hmu hlawm tawh a, anni bakah hian chanchinbu Editor ngaihsanawm tak tak pawh ka lo hmu ve nual tawh bawk a ni. Ka hmuhchak tak tak zamual liam tawh pawh an tam a, mah se heng mi ngaihsanawm tak takte hian thu tha tak tak chhiar tur min hnutchhiah hlawm avang erawh chuan lawmawm ka ti hle thung. Heng ka thuziah liam ve puat te hi insawiselna lamah min lo ngaihsak lo ula, Zofate lungrual taka kan awm tlan hi kei pawhin ka duhthusam ber a ni. Kan thuziah takte hi darthlalang atan hmang ila ka ti deuh a, ka darthlalang rawn chhawpchhuah hi a fiah vak lo anih erawh min hrethiam dawn nia.