Tuesday, February 27, 2007

Khawhar In Riah Khap Hi


Aizawl chhuahsan ngai lo ve tak hi ka ni a, thingtlang lama chhungte tlawha zin tur pawh hian Motor ka ruih thin vang hian ka zin peih thin lova. Mahse, han zin chhuah chang hi chuan kal kawnga Motor ka rui hreawm ka tih bak hi chu hreawm ka ti em em bik lem thin lo, hmun hmuh ngailoh hmuha mi hriat ngailoh han hriat te pawh hi anuam ve leh zek thin. Vai ram lama nikum kum laihawl vel khan kan zin ve a, hei ka la awm ta reng a. Han awm ve takah chuan a tih ve naw naw theih mai zel a, mahse Aizawl ka ngai thei khawp mai.

Ka zin chhuah hnu lawkah Misual.com atangin Zarkawt vengin mitthi in riah an khap tih ka han hre zui nghal a, chanchin thar hriat nuam a nih leh nih loh hriatthiam a har khawp mai. Engemaw chenah chuan a awlsam phian a, a tua tan pawh harsatna a awm lo a tih theih a. Mahse, han thlek kual deuh chuan a tuar tur chu mi rethei an ni tih chu a hriat reng a, chhungkaw rual lo tan phei chuan chanchinthar lawmawm lo ber pawl a ni ve ta hial ang!!..


Chhungkaw rual lo leh harsa ve tak tan chuan bungbel hawh dah tu tur te hmuh a lo harsa anga, a dahman chawi tur a lo tam ve phian phei chuan miin an ralna pawisa an neih chhun chhun kha an hman angai zui anga. Bungraw dah fel tur an la in hmuhzawhloh phei chuan chuti hlauh! Kan vengah hian khawhar in-ah ka riak ve nual tawh a, kan Section ni loahte pawh ka riak ve tawh thin a. Engemaw zawnga ngaihtuah chuan kan tangkaina leh kan hnawksakna teh hian kan tangkaina hian 55% velin hmun a la awh ve ni chuan ka hria.


Kan tangkai han tih hian chhungkaw rual in-ah chuan kan tangkai dan a nep viau thei, mahse chhungkaw berh ve tak in-ah chuan kan tangkai ve thei khawp mai. Bungbel dahna a hlat deuh chang phei chuan a hahthlak ve duh phian a nia, mahse mipa rual riak khawmin kan han tih chuan hreawm ti lem lovin kan zo ve thei mai zel. Kan tangkai lohna kan ti dawn nge hnawksakna lai pawh kan nei ve thin, khawhar in-a riak ni si in nei tute rei tak men chang a awm leh bawk thin.

Kan veng Ramhlun South-ah chuan mitthi kan neih reng rengin chhun dar 12 hnu lam a nih chuan kan tlaivarpui thin a, tlaivar zan hian thingpui sen kan lum mai thin a. Zing thlan lai pawh thingpui sen leh chhang thawp kan sem mai thin, hei pawh hi chhungkaw harsa tan chuan uiawm tak tur ala ni. Tlaivarpui an nih chuan zan hnih dang YMA zan ala awm a, chungah chuan tui kan sem leh mai a. Hei hi chu a tuate tan pawh a awlsam khawp mai, khawhar in-ah hian zan thum vel kan riak tlangpui. Kan chhuah tukah bungbel, thuthleng leh thildang kan dahfel nghal thin.

Hetiang ka han sawi te hi kan tangkai vena deuhte a ni a, mah se hmun thenkhatah chuan in riak ten an thil engengemaw an lo ru a. Khawhar lusunte lungngaihna belhchhahtu mai an ni thin tih thu hriat tur pawh a awm fova, a zia lo thin ngawt mai. Hetiang a nih chuan khawsa thei deuh tan chuan in riak neih lo kha a fuh zawk hmel viau a ni, a chhan chu an ni tan chuan bungbel dahna man leh thil dang dang kha chu engtham a tling si lova. Engemawzawng tak chuan a fuhna lai a awm mai thei, ka ngaihdanah chuan a tuar tu a zirin khawhar in riak neih leh neih loh hi chu a fuh ni berin a lang. Tunah hian veng engzatin nge khawhar in riah titawp tih ka hre chiah lova, ka hriatsual loh chuan veng hnih chiah ka la hria a.

An ching chhunzawm dawn anih chuan veng tin Y.M.A hnenah hian in riak neih duh leh duh lo hi in Report tur ti mai se a duh maiin ka ring, a duh chuan hming pe lawk diam mai ta se a fuh ka ring deuh. Khawhar in riah an khapna hmunah pawh hian khawhar in riak neih duh tak tak an awm thei a, an khap si chuan khawhar in riak an nei thei dawn lo tihna a ni mai a. Zalenna in rahbehsakte pawh a ang thei dawn alawm mawle, i duhtawk tawh mai ang. Eng ikhaw kan sawi kaw ve hlei lawng'e keini zawngin. vei zawng han chiarpui ve hi anuam ve hrim hrim e.

2 comments:

Anonymous said...

Mizoram ka awm lohna rei tawh lutuk a, chutiang mitthi chhungte riahpui theih loh thu chu i blog atangin ka lo hre ve chauh a, a pawi k ati, engatinge maw, tlangval thenkhat mitthi chhungte tuarpui tura riakin an thil te an lo ruk, a pawi ngei mai, kan Mizo tradition pawh a chhunzawm hleihtheih loh anih ber chu. .

ThugAngel a.k.a Hipholik said...

nia mawle...mitthi chhungte riahpui tur zingah hian thilsual lo ti duh hi an lo inrawlh ve leh zauh zel a...a buai an thlak a nih hi...a pawi ngawt asin, mah se kan veng-ah chuan kan la riahpui turah ka ngai ngawt a, an tih tawp thu ka la hre lo tlat..chumi ka sawi avang erawh chuan kan fihlim bik e ka tihna a ni lo ania, ka riah lohna a rei ve tawh khawp mai keipawh...:P

Ka Blog atanga thu engemaw i lo hre ve chu lawmawm hle mai, phur chang apiangin rawn tlawh thin dawn nia:)